Društvo

FOTO: Ponoćka označila početak katoličkog Božića

by Željko Milović / Darija Marđokić, photo by Sergej Zabijako | 25:12:2017 | 12:27:07

“Kroz ovu godinu doživjeli smo mnoge radosti i važne događaje za naš život s Bogom. Doživjeli smo posvećenje nove katedrale u Baru, koja nam omogućava da se okupimo i shvatimo i doživimo neizmjernu Božiju ljubav – milosrdnog oca koji nas neizmjerno ljubi i uvijek je spreman da nam oprosti grijehe i da nas zagrli. Upućen nam je poziv da budemo dobri vjernici. U ovoj svetoj noći, da li smo smogli snage pružiti ruku pomirenja svima onima sa kojima nismo bili pomireni?”, rekao je u Božićnoj poslanici, tokom tradicionalne ponoćne mise u katedrali Svetog Petra Apostola, nadbiskup barski Rrok Gjonlleshaj.
 
On je noćas, pred nekoliko stotina vjernika katoličke vjeroispovjesti, s kojima su bili i njihovi pravoslavni i muslimanski prijatelji, služio svečanu Svetu misu, kojoj su prisustvovali kao gosti i predsjednik Skupštine opštine Radomir Novaković i paroh barski, protojerej Mitropolije crnogorsko-primorske Srpske pravoslavne crkve Slobodan Zeković.

 
“U svetoj noći i božićne dane okupljamo se oko oltara poput siromašnih pastira koji su na glas anđela pohitili do isusovih jaslica. Naš oltar, naše obitelji, naše srce i naš život Kristove su jasle. Tu se on ponovno rađa i dolazi u našu sredinu. Naša crkva tako postajke njegov Betlehem – kuća kruha za sve izgladnjele duše. Nemojmo se bojati Kristu otvoriti sva vrata našega života, vrata naših obitelji, vrata naše države, vrata našega društva, vrata naših radosti i patnji... Budimo mi oni koji ga prepoznajemo da mognemo imati mogućnosti biti djeca Božija. Svi naši božićni susreti neka nam budu susret s Kristom, neka nam učvrste vjeru, uvećaju nadu i umnože ljubav. On, djetešce iz Betlehema, nas uči: ljubiti svijet onakvim kakvim jest, da tako po nama dođe u taj svijet što više svjetla i mira – najljepši dar djetešca koje nam se rodilo. Darovima mira, radosti i svijetla, svima Vama želim čestit i blagoslovljen Božić”, kazao je, pored ostalog, u Božićnoj poslanici msgr. Gjonlleshaj.

 
Posebnu pažnju vjernika privukla je višemetarska jelka, rad časnih sestara franjevki iz Nadbiskupije, crkvu su spolja iluminacijum ukrasili Pero Marković i Filip Jovović, a betlehemske jaslice unutar katedrale rad su Filipa Jovovića i Peka Pukića.