Veliki broj Barana danas je pored mora, na gradskom šetalištu, mogao da uživa u izvanrednom dvosatnom nastupu njemačkog putujućeg pijaniste Arne Shmitta, uličnog svirača.
Samouki je muzičar, koji je prvi javni nastup imao još 1984. godine. U 29. godini napustio je posao u radionici za popravku automobila i posvetio se uličnim nastupima. Živi u kamp kućici bez stalne adrese, krstareći Evropom i Azijom, pod motom “Piano Across The World”.
Od 1997. je svirao u više od 300 gradova, a od 2015. je nekoliko puta putovao u Kinu kako bi svirao klavir na ulici.
Osim vlastitih autorskih kompozicija, Schmitt improvizuje na temelju poznatih pop pjesama, naročito na numere Eltona Johna, Michaela Jacksona i Phila Collinsa, u šta su se danas mogli uvjeriti i Barani. Ovo, inače, nije prvi Schmittov ulični nastup u Baru – prvi je zabilježio na sopstvenoj facebook stranici još 17. oktobra.
Tokom godina Schmitt je često mijenjao svoj instrument i način prevoza. Muzički instrument, pripremljen za nastupe čak i na temperaturama ispod nule, izvorno je stajao na postolju koje se moglo ručno kotrljati. Danas svira najčešće klavir na postolju s elektromotorom, ali i električni karbonski klavir. Konstrukcija, koja teži 30 kilograma i može se sklopiti na kompaktnu veličinu za potrebe transporta, dizajnirana je tako da može ući u kabinu aviona.
Schmitt je društveno aktivan u sklopu projekata pomoći ugroženim licima – tako je 2018. održao dobrotvorni koncert od koga je prihod bio namijenjen projektu “Sonnennote”, moskovskom orkestru u kojem sviraju djeca s Daunovim sindromom. Iste godine, u Hanoveru je svirao kako bi skrenuo pažnju na nesigurnu situaciju ljudi koji žive kao beskućnici, a sav prihod je išao siromasima koji žive na pločnicima kraj tamošnje željezničke stanice.
Iza sebe ima četiri samostalna albuma: “Open Roads” (2004), “Kiss & Cry” (2009), “Back for Christmas” (2009) i “Golden October” (2014).
