Aktivisti Nevladine organizacije „Orijent“, u saradnji sa restoranom „La Piazza“ su proteklog mjeseca vikendom dijelili tople obroke za korisnike Narodne kuhinje. Obroci su pripremani u ovom restoranu, a do sada je podijeljeno preko 200 obroka.
Kako su najavili organizatori, akciju planiraju da nastave i u narednim mjesecima.
„Na ovu akciju nas je podstakla sve teža materijalna situacija jednog dijela društva – onih koji se uvijek nalaze na granici siromaštva. Naš skroman doprinos će biti i u narednom periodu podijela gotovih obroka i podjela osnovnih paketa namirnica za najugroženije“, kazao je jedan od aktivista NVO „Orijent“ i vlasnik restorana „La Piazza“, Zlatan Hot.
Ideja da pomognu najranjivijoj kategoriji društva, prema riječima Ervina Hadžiburića iz NVO „Orijent“, živi već par godina.
„Našli smo nekoliko donatora koji žele da ostanu anonimni i da, shodno mogućnostima, s vremena na vrijeme pomognu ugroženim porodicama. Podstaknuti radom Narodne kuhinje i znajući da im je pomoć uvijek dobrodošla zbog velikog broja korisnika, odlučili smo da je vikend pogodan za ovakve akcije, s obzirom da tada kuhinja ne radi. Ovom prilikom se zahvaljujemo svim donatorima, kao i Ljilji Vujović i grill restoranu ’La Piazza’“, zaključio je Hadžiburić.
