Tradicionalnim izlaskom na vrh Rumije i liturgijom u crkvi Svete Trojice danas je obilježen pravoslavni Trojičindan – silazak Svetog Duha na apostole.

Liturgiju je služio episkop dioklijski Pajsije, i u arhipastirskom slovu poručio da praznik govori o objedinjenju ljudi oko Boga i da ćemo se “kada se objedinimo oko Boga, objediniti i jedni sa drugima, i imati i istinski i nebeski život”.

Kako je naglasio episkop dioklijski, “crkva na vrhu Rumije podsjeća na vjeru svakoga od nas”.

“Nije nešto mnogo velika, ali je lijepa i vidi se sa svake strane. Tako smo se mi danas udaljili iz svega onoga svjetskog da ovdje, gdje se još bolje, još ljepše čuje glas Božiji, proslavimo Njegovo Ime, ono Ime koje nas proslavlja i koje nama daje život vječni. I kao što je ovo penjanje bilo malo naporno ali slatko, tako i cijeli naš put prema Bogu je pomalo naporan ali sladak i radostan”, kazao je episkop dioklijski Pajsije.