Krajem maja, građani Bara, naročito iz prigradskih naselja, često zovu jedinicu Službe zaštite da im iz kuće ili dvorišta uklone zmije. Nije drugačije ni ove godine. Gotovo svaki put riječ je o bezopasnim smukovima.
Sa ljetnjom sezonom i višim temperaturama, ponovo kreće aktivnost gmizavaca i veći broj susreta čovjeka i zmija.
Vatrogasci izuzetno profesionalno pristupaju ovom poslu, naravno, ne ubijajući životinje. Odnose ih u divljinu, na livadu ili u šumu. Smukovi su korisni za ljudska staništa jer uništavaju glodare i insekte. Ne napadaju ljude.
Samo juče su pripadnici Službe zaštite imali tri akcije uklanjanja zmija.
“Smukovi se zbog svoje veličine ljudima često učine strašnim… A vjerovatno su samo žedni. Potpuno su bezopasni, a često stradaju od metle ili lopate. Možete da se sklonite da nastavi svojim putem, a lako ga možete i ispratiti van dvorišta onom mekšom stranom od metle…”, napisao je na svom FB profilu vatrogasac Bojan Rukavina.
Slična stvar je zabilježena i jutros. Smuk se sklupčao na sami ulaz kuće Karađuzovića u Starom Baru, pa su vatrogasci Đuro Đurović i Peđa Đokvučić bili prinuđeni da ga maknu, i odnesu u maslinjake.
