Gost Radio Bara i Bar infa danas je bio jedan od najtrofejnih trenera u Crnoj Gori, Vladimir Milačić – šef stručnog štaba ŽOK Luka Bar. On nam je ispričao kako provodi dane socijalnog distanciranja u pandemiji kronavirusa.
“Kako sportistima, tako i ostalima nije svejedno i prijatno, svi su u istoj situaciji. Potpuno dijelimo zajedno ove trenutke mi sportisti kao i ostali građani naše zemlje, mada naša ‘branša’ nije baš navikla da bude u strogom mirovanju”, kazao je trener “sirena” Vladimir Milačić.
On provodi vrijeme gledajući stare snimke utakmica na tv-u.
“Upravo gledam snimak utakmice Real Madrid – Barselona. Murinjo je trener Reala na ovom snimku, a Gvardiola trener Barselone. Trenutno je 2:2 – nadam se da će Barselona to dobiti. Šalu na stranu, čujem se svakih par dana sa djevojkama kako su, je li sve OK. Svi čekamo da ovo čudo prođe i da se vratimo svojim svakodnevnim obavezama. Pokušavam ovih dana i sa knjigom ‘Moravska noć’ od nobelovca Petera Handkea, ali mi, moram priznati, ne ide baš najbolje”, kaže Milačić.
On se nada da ovo stanje neće baš dugo trajati.
“Ipak, u ovom trenutku zdravlje je najpreče, o sportu se malo razmišlja, odnosno sve ostalo će se dovesti u red kasnije. Sad dolazi do izražaja ona poslovica ‘strpljen – spašen’ i tako se treba ponašati. Negdje sam pročitao da se u Kini 15. aprila nastavlja fudbalsko i košarkaško prvenstvo. Treba ispoštovati sve mjere što savjetuju ljudi iz struke i nadam se da ćemo se svi naći vrlo brzo na terenu u dvorani. Uglavnom bez treninga i utakmica, gledam snimke odbojkaških utakmica, teniskih mečeva Đokovića jer sam njego fan, uglavnom prekraćuje se vrijeme i i ukućani me čudno gledaju kad ja nanovo gledajući sve te snimke navijam za moje favorite”, kaže Milačić.
“Glavno je da je porodica dobro, panike nema, ali mora da postoji strah i opreznost da svi zajedno prođemo bez većih problema. Supruga i ja imamo starije majke doma, pa zato ovih dana vrlo rijetko i idemo kod njih. Odemo samo kako bi dostavili osnovne namirnice. Glavno je sačuvati živu glavu, a to možemo ukoliko ispoštujemo sve preporuke i ostanemo doma, rekao je trener ŽOK Luka Bar Vladimir Milačić.
