U sveopštoj brizi za ljudske živote, prouzrokovanoj pandemijom koronavirusa, neki ljudi nisu zaboravili na “najbolje čovjekove prijatelje” – pse. Radi se o volonterkama koje o njima brinu i mimo korone. A bezdomni (kako ih one nazivaju) psi, ovih dana, djeluju uznemireno i njihov lavež još jače odjekuje u tišini koja vlada na barskim ulicama.
Volonterke se trude da situaciju drže pod kontrolom, a nije im lako. Učiteljica Milena Zoranović objašnjava i zbog čega: “Bilo je i ranije teško, sad je mnogo, mnogo teže. Iz prostog razloga što su restorani zatvoreni, a njihovi vlasnici bili su plemeniti prema bezdomnim psima, uvijek su im ostavljali višak hrane. Pojedini psi postali su i zaštitni znak nekih restorana”, ističe Zoranovićeva.
O psima, pored nje, svakodnevno brine mala grupa naših sugrađanki, poput Danijele Kralj, Ljubice Tomić, Vere Ivanović, Ane Zejak, Milice Leković iz Sutomora…
“Pohvalno je što se i drugi građani uključuju i hrane pse, najčešče granulama, neko ujutro, neko uveče, jer nam je svima kretanje ograničeno. Ostavljaju hranu i vodu na određenim mjestima i tako navikavaju pse kako ne bi odlazili iz svojih kvartova, jer to je mnogo bitno. Naime, svaka grupa pasa ima svoju teritoriju. Kad nemaju hranu, kreću da utole glad i žeđ na nekoj drugoj teritoriji. Onda se izmiješaju grupe pasa i postaje mučno od laveža, režanja, buke…”, objašnjava učiteljica Milena i apeluje na svoje sugrađane da ostavljaju hranu i vodu bezdomnim psima.
Ona podsjeća vlasnike pasa da i dalje mogu da sterilišu svoje ljubimce i da je ona najbitnija za sprječavanje nekontrolisanog porasta bezdomnih pasa na barskim ulicama.
