U rezervate prirode, unutar NP Skadarsko jezero, spadaju ornitološki (ptičiji) rezervati Manastirska tapija, Pančeva oka, Crni žar, a u barskoj opštini ostrva Grmožur i Omerova gorica.
Osim što ostrvo Grmožur, bivši zatvor u vrijeme kralja Nikole, zovu “crnogorskim Alkatrazom”, poznatiji je i po mnogo ljepšem imenu – Ostrvo ptica. Ostrvo je stalno stanište pojedinih vrsta ptica, a za neke vrste samo privremeno odmorište tokom njihove migracije iz srednje i sjeverne Evrope ka Africi.
Na ostrvu Omerova gorica (Gorica e Omerit) postoji među stablima lovora oko 40 gnijezda sivih čaplji, za koje se smatra da su jedina vrsta čaplji koje stanuju na ovoj aromatičnoj biljci. Osim sivih čaplji, tu žive i male bijele čaplje. Obje vrste spadaju u ugrožene i zakonom zaštićene vrste.
