Naš sugrađanin, Petar Jovićević osvojio je prvo mjesto u nagradnoj igri “Ulov godine 2023.” koju organizuje kompanija za proizvodnju i promet ribomaterijala i opreme za more “Una” iz Tivta.
Jovićeviću je pripao vaučer u iznosu od 150 eura, kojeg može potrošiti u Uninim prodavnicama SIPA ili Marine Centru, kao i i simbolična diploma firme UNA.
Petar je zubaca ulovio na nesvakidašnji način i ostvario pravi podvig! Zubatac je zagrizao malu udicu, ukrašenu đinđuvama i percetom, namjenjenu širunima i skušama. Riba je ulovljena na udaljenosti od oko 4 milje od Bara na dubini od oko 70m.
„Bili smo na jednoj daljoj poziciji, tražili smo skuše ili širune. Na sonaru se prikazalo jato ribe i odmah sam spustio sabiki (niz od nekoliko malih udica, koje su ‘ukrašene’ da imitiraju račiće ili mlađ ribe). Čim je sistem stigao do dna povukao sam na gore, ali se, kako se meni učinilo, zaglavio u pijesak. E taj pijesak je odjednom počeo da vuče. Riba je krenula da munjevito izvlači strunu sa mašinice, pa smo odmah shvatili da se radi o kapitalcu.”
Oprema koja je korištena za ulov je sabiki niz najlon debljine 0.45mm. Osnova struna je bila debljine 0.18mm. Štap kojim je riba upecana je Sea Master 7’FT 2/6LB, a mašinica Penn.
Više o njegovom tadašnjem ulovu možete pročitati OVDJE.
Drugo mjesto i vaučer u iznosu od 100 eura koga može potrošiti u Uninim prodavnicama SIPA ili Marine Centru osvojio je Boško Grivić sa ulovljenom hamom od 26,5 kg, a treće i vaučer u iznosu od 50 eura osvojio je Dalibor Lečić sa ulovljenom tunom od 85 kg.
